త్వరలోనే లోక్‌సభ ఎన్నికలు రాబోతున్న తరుణంలో.. కేంద్ర ఆర్థిక మంత్రి నిర్మలా సీతారామన్ ఆదాయ పన్ను వర్గాలకు ఊరట కల్పించేలా నిర్ణయం తీసుకుంటారని అందరూ అనుకున్నారు.
కానీ.. వారి ఆశలపై నీళ్లు చల్లుతూ గతేడాది ప్రతిపాదించిన కొత్త పన్ను విధానాన్నే ఈసారి కూడా కొనసాగించారు. దిగుమతి సుంకాలతో సహా అదే ప్రత్యక్ష, పరోక్ష పన్ను రేట్లను కొనసాగించాలని ఆమె ప్రతిపాదించారు. ఆదాయపు పన్ను కొత్త విధానంలో వారిలో రూ.7 లక్షల వరకు ఎలాంటి పన్ను ఉండదని పునరుద్ఘాటించారు. అయితే.. రీఫండ్‌ల సగటు సమయం మాత్రం 10 రోజులకు తగ్గించబడిందని.. 2013-2014 సమయంలో ఈ గడువు 93 రోజుల వరకు ఉండేదని హైలైట్ చేశారు. ఇక ఇన్‌కమ్ ట్యాక్స్ శ్లాబ్‌లను ఆరు నుంచి ఐదు తరగతులకు తగ్గించారు. పదండి.. పాత పన్ను శ్లాబ్‌లకు, కొత్త పన్ను శ్లాబ్‌లకు తేడాలేంటో తెలుసుకుందాం.
కొత్త పన్ను విధానంలోని శ్లాబ్స్
రూ. 3 లక్షల వరకు ఆదాయంపై పన్ను లేదు.
రూ. 3-6 లక్షల మధ్య ఆదాయంపై 5 శాతం పన్ను (సెక్షన్ 87A కింద పన్ను రాయితీ అందుబాటులో ఉంది).
రూ. 6-9 లక్షల మధ్య ఆదాయంపై 10 శాతం పన్ను (రూ. 7 లక్షల వరకు ఆదాయంపై సెక్షన్ 87A కింద పన్ను రాయితీ లభిస్తుంది).
రూ. 9-12 లక్షల మధ్య ఆదాయానికి 15 శాతం పన్ను
రూ. 12-15 లక్షల మధ్య ఆదాయానికి 20 శాతం పన్ను
రూ.15 లక్షలు లేదా అంతకంటే ఎక్కువ ఆదాయానికి 30 శాతం
(అయితే.. దేశీయ కంపెనీలకు కార్పొరేట్ పన్నుని 30 శాతం నుంచి 22 శాతానికి తగ్గించారు. కొన్ని రకాల తయారీ రంగ సంస్థలకు సైతం 15 శాతం పన్ను తగ్గించినట్లు కేంద్రమంత్రి వెల్లడించారు. మరోవైపు.. ఈ పన్ను రేట్లు సీనియర్ సిటిజన్‌లు, సూపర్ సీనియర్ సిటిజన్‌లతో సహా అన్ని వర్గాల వ్యక్తులకు ఒకే విధంగా ఉంటాయి).
పాత పన్ను విధానంలోని శ్లాబ్స్
రూ. 2.5 లక్షల వరకు ఆదాయానికి పన్ను మినహాయింపు
రూ. 2.5 నుంచి రూ.5 లక్షల మధ్య ఆదాయంపై 5 శాతం పన్ను
రూ. 5-10 లక్షల వరకు వ్యక్తిగత ఆదాయంపై 20 శాతం పన్ను
రూ.10 లక్షలు లేదా అంతకంటే ఎక్కువ వ్యక్తిగత ఆదాయంపై 30 శాతం పన్ను
(ఓల్డ్ రెజిమ్‌లో ఆదాయపు పన్ను మినహాయింపు పరిమితి 60 ఏళ్లు పైబడిన సీనియర్ సిటిజన్లకు రూ. 3 లక్షల వరకు ఉంది. కానీ 80 ఏళ్లలోపు, 80 ఏళ్లు పైబడిన సూపర్ సీనియర్ సిటిజన్లకు రూ. 5 లక్షల వరకు పరిమితి ఉంది)
