ఇరాన్, ఇజ్రాయెల్ మధ్య జరుగుతున్న యుద్ధం ప్రభావం ఇప్పుడు సామాన్యుల వంటగదిపై పడింది. అంతర్జాతీయంగా చమురు, గ్యాస్ సరఫరాలో అంతరాయం ఏర్పడటంతో భారత్లో ఎల్పిజి (LPG) ధరలు గణనీయంగా పెరిగాయి. దేశీయ సిలిండర్ ధర సుమారు రూ.60 పెరిగి రూ.900 దాటగా, వాణిజ్య సిలిండర్ ధర రూ.115 వరకు పెరిగింది. ఈ నేపథ్యంలో గ్యాస్ను పొదుపుగా వాడుకోవడం ఎలాగో ఇక్కడ తెలుసుకుందాం..
ధరల పెరుగుదలకు కారణం:
యుద్ధం కారణంగా గ్యాస్ రవాణాకు కీలకమైన ‘స్ట్రెయిట్ ఆఫ్ హార్ముజ్’ మార్గంలో ఆటంకాలు ఏర్పడ్డాయి. దీనివల్ల సరఫరా గొలుసు దెబ్బతిని ఇంధన ధరలు ఆకాశాన్ని తాకుతున్నాయి.
గ్యాస్ ఆదా చేసే సులభమైన చిట్కాలు:
ప్రెషర్ కుక్కర్ వాడకం: సాధారణ పాత్రల కంటే ప్రెషర్ కుక్కర్ వాడటం వల్ల ఇంధనం బాగా ఆదా అవుతుంది. ఇది కూరగాయలకు 70శాతం వరకు, పప్పు ధాన్యాలకు 46శాతం వరకు గ్యాస్ను మిగులుస్తుంది.
ధాన్యాలను నానబెట్టడం: బియ్యం, పప్పు వంటి వాటిని వండటానికి ముందు కాసేపు నానబెడితే అవి త్వరగా ఉడుకుతాయి. దీనివల్ల వంట సమయంతో పాటు గ్యాస్ కూడా ఆదా అవుతుంది.
చిన్న మంటపై వండటం: నీరు మరగడం ప్రారంభించిన తర్వాత మంటను తగ్గించడం వల్ల 25శాతం వరకు ఇంధనం వృథా కాకుండా చూడవచ్చు.
వెడల్పాటి పాత్రలు: వెడల్పాటి పాత్రలను వాడటం వల్ల బర్నర్ మంట పాత్ర అడుగున కేంద్రీకృతమై వేడి వృథా కాదు.
మూత పెట్టడం: వంట చేసేటప్పుడు పాత్రలపై మూత పెట్టడం వల్ల లోపల వేడి త్వరగా పెరిగి ఆహారం వేగంగా ఉడుకుతుంది.
బర్నర్లు శుభ్రంగా ఉంచడం: బర్నర్లు తుప్పు పట్టినా లేదా నల్లగా మారినా మంట సరిగ్గా రాదు. రెగ్యులర్గా వీటిని శుభ్రం చేయడం వల్ల గ్యాస్ వృథాను అరికట్టవచ్చు.
పెరుగుతున్న ధరల భారాన్ని తగ్గించుకోవడానికి ఈ చిన్నపాటి మార్పులు వంటగదిలో ఎంతో సహాయపడతాయి.
