జ్వరం తగ్గిందా.. నోటికి రుచి లేదా? ఒక్కసారి ఈ బెండకాయ వెల్లుల్లి కారం ట్రై చేయండి

వైరల్ జ్వరాలు వచ్చినప్పుడు మనం ఎక్కువగా బాధపడేది నోటికి రుచి తెలియకపోవడం వల్లనే. ఆహారం తినబుద్ధి కాదు. ఇలాంటప్పుడు బలహీనపడకుండా ఉండాలంటే ఏదో ఒకటి తినడం చాలా అవసరం. నోటికి రుచి తెలిసేలా, పోషకాలు అందేలా ఒక మంచి వంటకం ఉంటే బాగుండు అనిపిస్తుంది. సరిగ్గా ఇలాంటి సమయాల్లోనే ఈ బెండకాయ వెల్లుల్లి కారం రెసిపీ చాలా బాగా పనిచేస్తుంది. ఇది రుచిగా ఉండటమే కాదు, ఆరోగ్యానికి కూడా చాలా మంచిది. దీన్ని ఎలా తయారు చేయాలో చూద్దాం.

బెండకాయ వెల్లుల్లి కారం.. వేడి వేడి అన్నంలో కొద్దిగా నెయ్యి వేసుకుని తింటే ఆ రుచి మాటల్లో వర్ణించలేం. ఈ వంటకం రుచికరంగా ఉండటమే కాదు, ఆరోగ్యానికి ఎంతో మేలు చేస్తుంది. బెండకాయ, వెల్లుల్లి రెండింటిలోనూ అనేక పోషకాలు, ఔషధ గుణాలు ఉన్నాయి. దీన్ని తయారు చేయడం చాలా సులభం, పైగా దీనికి ఎక్కువ పదార్థాలు అవసరం లేదు.

కావాల్సిన పదార్థాలు:

బెండకాయలు

ఉప్పు

వెల్లుల్లిపాయలు

ఎండు మిరపకాయలు

ధనియాలు

జీలకర్ర

పచ్చి శెనగపప్పు

నూనె

పసుపు

తయారీ విధానం:

పావు కేజీ బెండకాయలను శుభ్రం చేసి, 2 అంగుళాల ముక్కలుగా కట్ చేయండి.

ఒక పాన్ లో 2 టేబుల్ స్పూన్ల పచ్చి శెనగపప్పు, 2 టేబుల్ స్పూన్ల ధనియాలు, 1 టీస్పూన్ జీలకర్ర వేసి వేయించండి.

అవి కొద్దిగా రంగు మారిన తర్వాత 10-12 ఎండుమిరపకాయలు వేసి అవి రంగు మారే వరకు వేయించి, స్టవ్ ఆపి చల్లార్చండి.

చల్లారిన తర్వాత, వాటిని మిక్సీ జార్ లో వేసి 7-8 వెల్లుల్లిపాయలు, రుచికి సరిపడా ఉప్పు వేసి మెత్తగా పొడి చేయండి.

ఇప్పుడు అదే పాన్ లో నూనె వేడి చేసి బెండకాయ ముక్కలు వేసి వేయించండి.

బెండకాయ ముక్కలు రంగు మారిన తర్వాత, అందులో పసుపు వేసి కలపండి.

చివరగా, ముందుగా తయారుచేసుకున్న పొడి వేసి బాగా కలపండి. 2-3 నిమిషాలు తక్కువ మంట మీద ఉడికించి స్టవ్ ఆపండి.