ఈపీఎఫ్ఓ 3.0: పీఎఫ్ ఉపసంహరణపై కేంద్ర మంత్రి ప్రత్యేక వ్యాఖ్యలు… ఏటీఎంల ద్వారా డబ్బు తీసుకునే అవకాశముందా..?
భారతదేశంలో ఉద్యోగుల సంఖ్య జనాభాకు అనుగుణంగా పెరుగుతోంది. ప్రత్యేకంగా ప్రైవేట్ సెక్టార్లో ఉద్యోగులు ఎక్కువ మంది ఉన్నారు.
వీరి రిటైర్మెంట్ తర్వాత ఆర్థిక భద్రత కల్పించడానికి కేంద్ర ప్రభుత్వం ఈపీఎఫ్ఓ పథకాన్ని అమలు చేస్తుంది.
కానీ మారుతున్న టెక్నాలజీని అనుసరించి ఈపీఎఫ్ఓను నవీకరిస్తున్నారు. ప్రత్యేకంగా కేంద్ర ప్రభుత్వం ఈపీఎఫ్ఓ 3.0 వెర్షన్‌ను త్వరలో అమలు చేస్తామని ప్రకటించింది.
ఈపీఎఫ్ఓ 3.0 ద్వారా మెంబర్లకు మరింత మెరుగైన సౌకర్యాలు అందుబాటులోకి వస్తాయని కేంద్ర ప్రభుత్వం హామీ ఇచ్చింది.
ఉద్యోగుల ప్రొవిడెంట్ ఫండ్ సభ్యులు తమ పీఎఫ్ పొదుపులను ఏటీఎంల నుండి నేరుగా ఉపసంహరించుకునే సౌకర్యం వస్తుందని కేంద్ర కార్మిక, ఉపాధి మంత్రి మన్సుఖ్ మాండవియా తెలిపారు.
ఈపీఎఫ్ఓ 3.0 వెర్షన్ ప్రధాన టెక్నికల్ అప్‌గ్రేడ్‌గా మే లేదా జూన్ 2025లో అందుబాటులోకి వస్తుందని ఆయన చెప్పారు.
ఏటీఎంల ద్వారా ఫండ్స్ ఉపసంహరణతో సహా అనేక సరళీకృత సేవలు అందుబాటులోకి వస్తాయని ఇటీవలి ఇంటర్వ్యూలో స్పష్టం చేశారు.
ప్రస్తుతం పీఎఫ్ ఉపసంహరణ కోసం క్లెయిమ్‌లు దాఖలు చేసి, ప్రాసెసింగ్ కోసం వేచి ఉండాల్సి ఉంటుంది. కానీ వెర్షన్ 3.0లో క్లెయిమ్‌ల ఆటో-సెటిల్‌మెంట్ వ్యవస్థ మరింత సులభతరం అవుతుంది.
దేశంలోని 9 కోట్లకు పైగా ఈపీఎఫ్ఓ లబ్ధిదారులకు యూజర్ ఫ్రెండ్లీ అనుభవం కల్పించడమే ఈపీఎఫ్ఓ 3.0 యొక్క ప్రధాన లక్ష్యమని మాండవియా వివరించారు.
ఇకపై మెంబర్లు డిజిటల్‌గా ఓటీపీ ఆధారిత ధృవీకరణ ద్వారా తమ పీఎఫ్ ఖాతాలను నవీకరించుకోవచ్చు.
అదేవిధంగా వారి పెన్షన్ హక్కులను మానిటర్ చేసుకోవచ్చు లేదా ఫండ్స్ ఉపసంహరించుకోవచ్చు. క్లెయిమ్‌లు త్వరగా పరిష్కరించబడటం వల్ల ఫండ్స్ మెంబర్ల బ్యాంక్ ఖాతాలకు వేగంగా జమవుతాయని మాండవియా తెలిపారు. ఈపీఎఫ్ఓ ప్రస్తుతం రూ.27 లక్షల కోట్ల కార్పస్‌ను కలిగి ఉంది.
అలాగే సార్వభౌమ హామీతో 8.25% వడ్డీ రేటును అందిస్తోంది. 2024-25 ఆర్థిక సంవత్సరంలో యజమానులు దాఖలు చేసిన 1.25 కోట్ల ఎలక్ట్రానిక్ చలాన్ కమ్ రిటర్న్‌లు (ఈసీఆర్‌లు) ద్వారా రూ.3.41 లక్షల కోట్లకు పైగా విరాళాలు సేకరించారు.
ప్రధాన అప్‌గ్రేడ్‌లు ఇవి:
ఈపీఎఫ్ఓ మునుపటి వెర్షన్ 2.01 అమలుతో ఫిర్యాదుల పరిష్కారం గణనీయంగా మెరుగుపడిందని మంత్రి మాండవియా పేర్కొన్నారు. ప్రత్యేకంగా ఫిర్యాదుల సంఖ్య 50% కంటే తక్కువకు తగ్గిందని వివరించారు.
కానీ వెర్షన్ 3.0 ద్వారా సేవలను మరింత స్పష్టమైన, స్వీయ-సేవా ఆధారితంగా మార్చడమే ప్రధాన లక్ష్యమని ఆయన చెప్పారు.
కవరేజ్, యాక్సెసిబిలిటీని పెంచడానికి అటల్ పెన్షన్ యోజన, ప్రధాన మంత్రి జీవన్ బీమా యోజన, శ్రామిక జన ధన్ యోజన వంటి వివిధ సామాజిక భద్రతా పథకాలను ఒకే వేదిక కిందకు తీసుకురావడానికి ప్రభుత్వం కృషి చేస్తోందని తెలిపారు.
ఈపీఎఫ్ఓ పెన్షనర్లు ఇప్పటికే భారతదేశం అంతటా ఏదైనా బ్యాంక్ ఖాతాలో తమ నెలవారీ పెన్షన్లను సులభంగా పొందగలరు.
ఈపీఎఫ్ఓతో పాటు, ఎంప్లాయీస్ స్టేట్ ఇన్సూరెన్స్ కార్పొరేషన్ (ఈఎస్ఐసీ) లబ్ధిదారులు త్వరలో ఆయుష్మాన్ భారత్ పథకం కింద నమోదు చేసుకున్న ఆసుపత్రులలో ఉచిత వైద్య సేవలను పొందగలరని మాండవియా ప్రకటించారు.
స్వచ్ఛంద సంస్థలు నిర్వహించే ప్రైవేట్ హాస్పిటల్స్ కూడా ఈ పథకంలో భాగమవుతాయని వివరించారు. ప్రస్తుతం ఈఎస్ఐసీ 165 ఆసుపత్రులు, 1,500కి పైగా డిస్పెన్సరీలు, సుమారు 2,000 నమోదిత ఆసుపత్రుల ద్వారా దాదాపు 18 కోట్ల మందికి సేవలందిస్తోంది.
