రోటీలు, పూరీలు, చపాతీలు అంటే చాలా మందికి ఇష్టం. ముఖ్యంగా పిల్లలు ఎంతో ఇష్టంగా తింటున్నారు. చపాతీ, రోటీలు ఆరోగ్యానికి కూడా చాలా మంచిది. ఉదయం, రాత్రి పూట కూడా వీటినే తింటున్నారు.
ఇవి తినడానికి చాలా రుచిగా ఉంటాయి. కానీ చేయడానికి మాత్రం కాస్త శ్రమించాల్సిందే. పిండిని పిసికి, చపాతీలను చేసి.. కాల్చి చేయాలి. ఏది ఎలా ఉన్నా పిండి సరిగ్గా కలిపితేనే చపాతీలు, రోటీలు ఎంతో రుచిగా ఉంటాయి. అయితే పిండి కలిపేటప్పుడు చేతులకు జిగటగా ఉంటాయి. చేతులకు అంటుకుని చిరాకుగా అనిపిస్తుంది. అలా అని సరిగా కలపకపోతే.. చపాతీలు, రోటీలు, పుల్కాలు సరిగా రావు. మరి చేతులకు జిగటగా అంటుకోకుండా.. చపాతీలు, రోటీలు, పుల్కాలు బాగా రావాలంటే.. ఈ చిట్కాలు ట్రై చేయండి.
కూల్ వాటర్ ఉపయోగించండి:
సాధారణంగా చపాతీలు, పుల్కాలు చేసేటప్పుడు వేడి నీరు కలుపుతూ ఉంటారు. కానీ చేతులకు అంటుకోకుండా ఉండాలంటే సాధారణంగా ఉండే చల్లని నీరు వాడాలి. ఇలా చేయడం వల్ల గిన్నెకు, చేతులకు పిండి అంటుకోకుండా ఉంటుంది. అలాగే పిండి కూడా చాలా సాఫ్ట్‌గా ఉంటుంది.
మీ చేతులకు ఆయిల్ రాయండి:
పిండి కలిపేటప్పుడు చేతులకు అంటుకోకుండా ఉండాలంటే ఈ చిట్కా కూడా చక్కగా పని చేస్తుంది. పిండిని కలపడానికి ముందు చేతులకు కొద్దిగా నూనె రాసుకోండి. ఇలా చేయడం వల్ల పిండి చేతులకు జిగటగా అంటుకోదు.
ఉప్పుతో రుద్దండి:
చేతులకు, గిన్నెలకు, చపాతీలు చేసిన తర్వాత కర్ర, పీటకు అంటిన పిండి తొలగాలంటే ఉప్పు ఎంతో చక్కగా పని చేస్తుంది. మీ చేతులు లేదా పాత్రలపై కొద్దిగా ఉప్పు లేదా సాల్ట్ వేసుకోండి. పాత్రలను, చేతులను బాగా రుద్దుకోవాలి. ఇలా చేస్తే చేతికి, పాత్రలకు అంటుకున్న పిండి ఈజీగా వదిలిపోతుంది.
బేకింగ్ సోడా ఉపయోగించండి:
చేతులకు, పాత్రలకు అంటుకున్న పిండిని వదిలించు కోవడంలో బేకింగ్ సోడా కూడా చక్కగా పని చేస్తుంది. చపాతీలు చేసిన తర్వాత.. ఒక గిన్నెలో కొద్దిగా బేకింగ్ సోడా, నీళ్లు వేసి పేస్టులా చేసుకోవాలి. ఆ తర్వాత పాత్రలు, చేతులు రుద్దు కోవాలి. ఇలా చేయడం వల్ల చేతులకు అంటుకున్న పిండి త్వరగా వదులుతుంది.
(NOTE: ఇంటర్నెట్‌లో సేకరించిన సమాచారం ఆధారంగా ఈ వివరాలు మీకు అందించటం జరిగింది. ఇందులోని అంశాలు కేవలం అవగాహన కోసం మాత్రమే. )
