ఏం వండాలో తెలియకపోతే ఇలా టమాటో కుర్మా చేయండి అన్నం,చపాతీ,లోకి అదిరిపోద్ది..

నిపుణుల ప్రకారం, టమాటాలను ఆహారంలో భాగం చేసుకోవడం వల్ల గుండె సంబంధిత వ్యాధులు వచ్చే అవకాశాలు తగ్గుతాయి.

చర్మ సంరక్షణలో కూడా టమాటాలు గొప్పగా సహాయపడతాయి. అంతేకాక, టమాటాలు తీసుకోవడం వల్ల క్యాన్సర్ వచ్చే సంభావ్యత తగ్గుతుంది, కంటి చూపు మెరుగవుతుంది, రక్తంలో చక్కెర స్థాయిలు నియంత్రణలో ఉంటాయి, మరియు జీర్ణ వ్యవస్థ మెరుగుపడుతుంది.

టమాటాలను వివిధ ఆహార పదార్థాల తయారీలో ఉపయోగిస్తాం. ఇవి ఇతర కూరగాయలతో కలిపి వండడానికి, అలాగే పప్పు, పచ్చడి, కుర్మా వంటి రుచికరమైన వంటల తయారీలో వాడతాం. టమాటా కుర్మా కూడా చాలా రుచిగా ఉంటుంది. ఇప్పుడు టమాటా కుర్మా తయారీ విధానం మరియు దానికి కావాల్సిన పదార్థాల గురించి తెలుసుకుందాం.

టమాటా కుర్మా తయారీకి కావాల్సిన పదార్థాలు:
టమాటాలు – అర కిలో
తరిగిన ఉల్లిపాయ – 1
తరిగిన పచ్చిమిర్చి – 2
ఎండు కొబ్బరి ముక్కలు – కొద్దిగా
జీడిపప్పు – 5 లేదా 6
లవంగాలు – 3
యాలకులు – 3
దాల్చిన చెక్క – 2 (చిన్నవి)
అల్లం వెల్లుల్లి పేస్ట్ – 1 టేబుల్ స్పూన్
పెరుగు – అర కప్పు
ధనియాల పొడి – 1 టేబుల్ స్పూన్
గరం మసాలా – 1 టేబుల్ స్పూన్
నూనె – 2 టేబుల్ స్పూన్లు
కారం – 1 టేబుల్ స్పూన్
ఉప్పు – రుచికి సరిపడా
పసుపు – ¼ టీ స్పూన్
నీళ్లు – 1 గ్లాసు
తరిగిన కొత్తిమీర – కొద్దిగా

టమాటా కుర్మా తయారీ విధానం:
ముందుగా టమాటాలను పెద్ద ముక్కలుగా తరిగి పెట్టుకోవాలి.ఒక కళాయిలో నూనె వేసి వేడి చేసిన తర్వాత, తరిగిన ఉల్లిపాయలు, పచ్చిమిర్చి వేసి బాగా వేయించాలి.
తర్వాత అల్లం వెల్లుల్లి పేస్ట్ వేసి, పచ్చి వాసన పోయే వరకు వేయించాలి.ఇప్పుడు టమాటా ముక్కలను వేసి, కలిపి, మూత పెట్టి, మధ్యస్థ మంటపై 10 నిమిషాల పాటు ఉడికించాలి.

ఒక జార్‌లో ఎండు కొబ్బరి, జీడిపప్పు, లవంగాలు, యాలకులు, దాల్చిన చెక్క వేసి మెత్తని పేస్ట్‌గా చేసుకోవాలి.టమాటాలు పూర్తిగా ఉడికిన తర్వాత, పైన తయారు చేసిన పేస్ట్, పెరుగు, కారం, పసుపు, ధనియాల పొడి, గరం మసాలా, రుచికి సరిపడా ఉప్పు వేసి బాగా కలపాలి.

మూత పెట్టి, నూనె పైకి తేలే వరకు ఉడికించాలి.ఆ తర్వాత ఒక గ్లాసు నీళ్లు పోసి, మరో 5 నిమిషాలు ఉడికించాలి.చివరగా, తరిగిన కొత్తిమీర వేసి కలిపి, స్టవ్ ఆపేయాలి.ఇలా తయారు చేసిన టమాటా కుర్మా చాలా రుచిగా ఉంటుంది. దీనిని అన్నం, చపాతీ, పులావ్, లేదా పుల్కాతో కలిపి తింటే మరింత రుచిగా ఉంటుంది.