పర్యావరణ పరిరక్షణలో భాగంగా అన్ని ప్రభుత్వాలు విద్యుత్ శ్రేణి వాహనాలను ప్రమోట్ చేస్తున్నాయి. సంప్రదాయ పెట్రోల్, డీజిల్ ఇంజిన్ వాహనాలను వీలైనంత వరకూ తగ్గించి వాటికి ప్రత్యామ్నాయంగా విద్యుత్ వాహనాలను తీసుకొస్తున్నాయి. ఈ క్రమంలో కంపెనీలు కూడా పెద్ద ఎత్తున కొత్త ఎలక్ట్రిక్ ఉత్పత్తులను లాంచ్ చేస్తున్నాయి. ముఖ్యంగా ద్విచక్రవాహనాలు మార్కెట్లో బాగా విస్తరిస్తున్నాయి. బైక్స్ కొంత మేర తక్కువగా ఉన్నా.. స్కూటర్లు మాత్రం సంప్రదాయ పెట్రోల్ ఇంజిన్లకు సవాలు విసురుతున్నాయి. అయితే ఎలక్ట్రిక్ బైక్స్ కూడా ఇటీవల కాలంలో బాగానే పుంజుకుంటున్నాయి. అత్యాధునిక ఫీచర్లు, డిఫరెంట్ లుక్స్ తో ఎలక్ట్రిక్ బైక్స్ లాంచ్ అవుతున్నాయి. అయితే వీటి ధర కాస్త ఎక్కువగానే ఉంటోంది. ఈ నేపథ్యంలో మార్కెట్లో రూ. 2లక్షల లోపు ధరలో అందుబాటులో ఉన్న బెస్ట్ ఎలక్ట్రిక్ బైక్స్ గురించి తెలుసుకుందాం..
రివోల్ట్ ఆర్వీ400.. ఈ బైక్ ధర రూ. 1.62 లక్షల(ఎక్స్-షోరూమ్) ఉంటుంది. వేరియంట్ ఆధారంగా సింగిల్ చార్జ్ పై 80-150 కిలోమీటర్ల రేంజ్ ఇస్తుంది. వారాంతపు విహారయాత్రలకు, సుదూర ప్రయాణాలతో పాటు సిటీల్లో ప్రయాణాలకు కూడా చాలా అనువైనదిగా ఉంటుంది. ఈ బైక్లో ఎకో, నార్మల్, స్పోర్ట్ అనే మూడు రైడింగ్ మోడ్‌లు ఉన్నాయి. దీని గరిష్ట వేగం గంటకు 85కిలోమీటర్లు. ఈ బైక్లో 3కేడబ్ల్యూ, 170ఎన్ఎం టార్క్ పవర్ అవుట్ పుట్ వస్తుంది. ఇది బైక్ పనితీరును ట్రాక్ చేయడానికి, ఛార్జింగ్ స్టేషన్‌లు, ఎల్ఈడీ లైటింగ్ సిస్టమ్, డిజిటల్ ఇన్స్ట్రుమెంట్ క్లస్టర్‌ను నియంత్రించడానికి స్మార్ట్ఫోన్ యాప్‌ను కూడా కలిగి ఉంది.
టోర్క్ క్రాటోస్ ఆర్.. ఈ బైక్ ధర రూ. 1.65లక్షలు ఉంటుంది. దీని గరిష్ట వేగం గంటకు 105 కి.మీ. ఉంటుంది. ఇది సింగిల్ ఛార్జ్‌పై 180 కిమీ రేంజ్ ఇస్తుంది. 3కేడబ్ల్యూహెచ్ బ్యాటరీ ఉంటుంది. 38 ఎన్ఎం టార్క్, 6 కేడబ్ల్యూ పవర్ అవుట్‌పుట్. కేవలం ఒక గంటలో 80% వరకు ఛార్జ్ చేయగల క్విక్ చార్జింగ్ టెక్నాలజీతో ఇది వస్తుంది. దీనిలో రీజనరేటివ్ బ్రేకింగ్, కంప్యూటరైజ్డ్ ఇన్స్ట్రుమెంట్ ప్యానెల్, ఎల్ఈడీ లైటింగ్, స్పోర్టీ స్టైల్ వంటి ఫీచర్లు ఉంటాయి.
ఓబెన్ రోర్ ఆర్.. దీని ధర రూ. 1.50లక్షలు(ఎక్స్ షోరూం) ఉంటుంది. ఇది భారతదేశంలో ఓ హై ఎండ్ ఎలక్ట్రిక్ మోటార్ బైక్. ఈ బైక్ గరిష్ట వేగం గంటకు 100కిలోమీటర్ల వేగంతో ప్రయాణిస్తుంది. ఒక్కసారి ఛార్జ్ చేస్తే 187 కిలోమీటర్ల రేంజ్ ఇస్తుంది. 180 ఎన్ఎం టార్క్, 30 కేడబ్ల్యూ పవర్ అవుట్‌పుట్ ఇచ్చే 4.4 కేడబ్ల్యూహెచ్ బ్యాటరీని కలిగి ఉంది. ఈ బ్యాటరీని 2 గంటల్లో 80% వరకు ఛార్జ్ చేయగల క్విక్ ఛార్జింగ్ మెకానిజంతో వస్తుంది. ప్రిడిక్టివ్ మెయింటెనెన్స్, రైడ్ ఇన్ఫర్మేషన్, బ్యాటరీ స్టేటస్, జియో-ఫెన్సింగ్, జియో-ట్యాగింగ్, బ్యాటరీ చోరీ నివారణ, ఛార్జింగ్ స్టేషన్ లొకేషన్, ఆన్-డిమాండ్ సర్వీస్, రోడ్‌సైడ్ సపోర్ట్ వంటివి కొన్ని అదనపు ఫీచర్లు.
మ్యాటర్ ఏరా 5000+.. ఈ బైక్ ధర భారతీయ మార్కెట్లో రూ.1.43 నుంచి రూ. 1.53 లక్షలు (ఎక్స్-షోరూమ్) ఉంటుంది. ఇది ఒక్కసారి ఛార్జ్ చేస్తే 125 కిమీల వరకు ఆకట్టుకునే రేంజ్‌ను అందిస్తుంది. ఇది గరిష్టంగా 90 కిమీ/గం వేగంతో ప్రయాణించగలగుతుంది. 160ఎన్ఎం గరిష్ట టార్క్‌ను అందించే శక్తివంతమైన 10,000వాట్ల మోటార్‌తో వస్తుంది. బ్యాటరీ పూర్తిగా చార్జ్ అవడానికి 5 గంటల సమయం తీసుకుంటుంది. ఇది నలుపు, తెలుపు రంగుల్లో అందుబాటులో ఉంటుంది. రీజెనరేటివ్ బ్రేకింగ్ సిస్టమ్‌తో కూడా వస్తుంది.
హాప్ ఓక్సో.. దీని ధర రూ.1.65 లక్షలు (ఎక్స్-షోరూమ్) ఉంటుంది. ఇది ఇది ఒక్కసారి ఛార్జ్ చేస్తే 150 కిమీల వరకు ఆకట్టుకునే రేంజ్‌ను అందిస్తుంది. గంటకు 95 కిలోమీటర్ల గరిష్ట వేగంతో ప్రయాణిస్తుంది. 200 ఎన్ఎం గరిష్ట టార్క్‌ను అందించే శక్తివంతమైన మోటార్‌తో వస్తుంది. పూర్తిగా చార్జ్ అవడానికి 5 గంటల సమయం తీసుకుంటుంది. ట్రూ బ్లాక్, క్యాండీ రెడ్, ఎలక్ట్రిక్ ఎల్లో, మిడ్‌నైట్ బ్లూ కలర్ ఆప్షన్లతో వస్తుంది.
