శాంసంగ్ ఫ్లాగ్ షిప్ గెలాక్సీ ట్యాబ్లెట్ల లైనప్ లోకి మరో రెండు సరికొత్త టాబ్లెట్స్ చేరాయి. కొత్తగా శాంసంగ్ గెలాక్సీ ట్యాబ్ ఎస్ 10 అల్ట్రా, శాంసంగ్ గెలాక్సీ ట్యాబ్ ఎస్ 10 ప్లస్ లను భారతదేశంలో లాంచ్ చేశారు. వీటిలో లేటెస్ట్ ఏఐ ఫీచర్లను పొందుపర్చారు. పూర్తి వివరాలను ఇక్కడ చూడండి..
శాంసంగ్ గెలాక్సీ ఎస్ 10 సిరీస్ టాబ్లెట్స్ ను భారత్ లో అధికారికంగా ఆవిష్కరించారు. అందులో భాగంగా, శాంసంగ్ గెలాక్సీ ట్యాబ్ ఎస్ 10 అల్ట్రా, శాంసంగ్ గెలాక్సీ ట్యాబ్ ఎస్ 10+ లను భారత్ లో లాంచ్ చేశారు. వీటిలో శాంసంగ్ గెలాక్సీ ట్యాబ్ ఎస్ 10 అల్ట్రా లో 14.6 అంగుళాల అమోఎల్ఈడీ 2ఎక్స్ డిస్ప్లే ను, శాంసంగ్ గెలాక్సీ ట్యాబ్ ఎస్ 10+ లో 12.4 అంగుళాల అమోఎల్ఈడీ 2ఎక్స్ డిస్ప్లే ను అందించారు. గత తరం మోడళ్లతో పోలిస్తే వీటి పెర్ఫార్మెన్స్ మరింత వేగంగా ఉంటుందని శాంసంగ్ చెబుతోంది. సీపీయూ పనితీరులో 18%, ఎన్పీయు పనితీరులో 14%, జీపీయూ శక్తిలో 28% మెరుగుదల ఉంటుందని హామీ ఇస్తోంది.
శాంసంగ్ గెలాక్సీ ఎస్ 10 సిరీస్ టాబ్లెట్ల ధరలు, ఇతర వివరాలు
నాన్ సెల్యులార్ వెర్షన్ల కోసం శాంసంగ్ గెలాక్సీ ట్యాబ్ ఎస్ 10 అల్ట్రా 256 జీబీ + 12 జీబీ వేరియంట్ ధరను రూ .1,08,999గా నిర్ణయించారు. అలాగే, 512 జీబీ + 12 జీబీ మోడల్ ధరను రూ . 1,19,999 గా నిర్ణయించారు. గెలాక్సీ ట్యాబ్ ఎస్ 10 ప్లస్ లో 256 జీబీ +12 జీబీ వేరియంట్ ధరను రూ.90,999గా నిర్ధారించారు. 5జీ కనెక్టివిటీ ఉన్న సెల్యులార్ మోడళ్లకు ట్యాబ్ ఎస్10 అల్ట్రా ధర 256 జీబీ + 12 జీబీ వేరియంట్ కు రూ.1,22,999, అలాగే, 512 జీబీ + 12 జీబీ వేరియంట్ రూ.1,33,999 గా నిర్ణయించారు. గెలాక్సీ ట్యాబ్ ఎస్10 ప్లస్ సెల్యులార్ మోడల్ ధరను రూ.1,04,999 గా నిర్ధారించారు. ఈ రెండు ట్యాబ్లెట్లు మూన్ స్టోన్ గ్రే, ప్లాటినం సిల్వర్ అనే రెండు రంగుల్లో లభిస్తాయి. గెలాక్సీ ట్యాబ్ ఎస్ 10 అల్ట్రా, గెలాక్సీ ట్యాబ్ ఎస్ 10+ సెప్టెంబర్ 27 నుండి భారతదేశంలో అందుబాటులో ఉంటాయి.
శాంసంగ్ గెలాక్సీ ఎస్ 10 సిరీస్ టాబ్లెట్ల స్పెసిఫికేషన్లు
శాంసంగ్ గెలాక్సీ ట్యాబ్ ఎస్ 10 అల్ట్రా, ట్యాబ్ ఎస్ 10+ లు మీడియాటెక్ డైమెన్సిటీ 9300+ చిప్ సెట్, 12 జిబి ర్యామ్ తో పనిచేస్తాయి. ఈ రెండు ట్యాబ్లెట్లు ఆండ్రాయిడ్ 14 ఓఎస్ తో వస్తాయి. ప్రధానంగా వీటిలో పలు ఏఐ () ఫీచర్లను పొందుపర్చారు. బ్యాటరీ విషయానికొస్తే, ట్యాబ్ ఎస్ 10 అల్ట్రా లో 12,000 ఎంఏహెచ్ యూనిట్ ఉంటుంది. గెలాక్సీ ట్యాబ్ ఎస్ 10+ లో 10,090 ఎంఏహెచ్ బ్యాటరీ ప్యాక్ ఉంది.
డిస్ ప్లే
ట్యాబ్ ఎస్ 10 అల్ట్రా (Samsung Galaxy Tab S10 Ultra) లో 14.6 అంగుళాల డైనమిక్ అమోలెడ్ 2ఎక్స్ ప్యానెల్, ట్యాబ్ ఎస్ 10+ (Samsung Galaxy Tab S10 Plus) లో 12.4 అంగుళాల ప్యానెల్ ఉన్నాయి. రెండూ గరిష్టంగా 120 హెర్ట్జ్ రిఫ్రెష్ రేట్ కలిగి ఉంటాయి. వీటిపై శాంసంగ్ యాంటీ రిఫ్లెక్టివ్ కోటింగ్ ఉంటుంది. అదనంగా, రెండు టాబ్లెట్లలో ఎస్ పెన్ ఉంది. ఇది బ్లూటూత్ లో ఎనర్జీ తో పనిచేస్తుంది.
కెమెరా
కెమెరాల విషయానికొస్తే, రెండు డివైజ్ లలో 13 మెగాపిక్సెల్ మెయిన్ వైడ్ కెమెరా, 8 మెగాపిక్సెల్ అల్ట్రా-వైడ్ షూటర్ ఉన్నాయి. అయితే ముందు భాగంలో గెలాక్సీ ట్యాబ్ ఎస్ 10 అల్ట్రా లో డ్యూయల్ 12 మెగాపిక్సెల్ కెమెరా సెటప్ ఉంటుంది. గెలాక్సీ ట్యాబ్ ఎస్ 10 ప్లస్ లో సింగిల్ 12 మెగాపిక్సెల్ సెటప్ ఉంది.
ఏఐ ఫీచర్లు
అదనంగా, ఈ రెండు శాంసంగ్ టాబ్లెట్లు ఐపి 68 డస్ట్ అండ్ వాటర్ రెసిస్టెన్స్, ఇన్-డిస్ప్లే ఫింగర్ ప్రింట్ స్కానర్ తో వస్తాయి. ఇంకా, ఈ టాబ్లెట్లలో స్కెచ్ టు ఇమేజ్ టూల్, సర్కిల్ టు సెర్చ్ ఫంక్షన్ వంటి ఆర్టిఫిషియల్ ఇంటెలిజెన్స్ (artificial intelligence) ఫీచర్లు ఉన్నాయి. వినియోగదారులు ప్రస్తుతం వాడుతున్న యాప్ ను విడిచిపెట్టకుండా టెక్స్ట్, చిత్రాలు లేదా వీడియోలను సెర్చ్ చేయడానికి లేదా అనువదించడానికి ఇవి వీలు కల్పిస్తాయి. గణితం (maths), భౌతిక సమస్యలకు పరిష్కారాలు చూపుతాయి. ఎస్ పెన్స్ ఎయిర్ కమాండ్ లేదా బుక్ కవర్ కీబోర్డ్ ద్వారా యాక్సెస్ చేయగల బిక్స్ బీ , గూగుల్ జెమిని వంటి ఏఐ అసిస్టెంట్లు కూడా ఈ డివైజ్ లో ఉన్నాయి.
