ఏ బిజినెస్ పెట్టినా అందులో మార్కెటింగ్, ప్రమోషన్స్, యాడ్స్ చాలా ముఖ్యం. ఇక రియల్ ఎస్టేట్ రంగానికి వస్తే.. ప్లాట్లను, ఇళ్లను, విల్లాలను అమ్మేందుకు.. జనాలను ఆకట్టుకునేందుకు అనేక ప్రయత్నాలు చేస్తూ ఉంటారు. ప్లాట్లలో అయితే వివిధ రకాల చెట్లు.. ఇళ్లు, విల్లాల విషయానికి వస్తే గిఫ్ట్‌లు, ఇంటీరియర్ సహా అనేక సదుపాయాలను కల్పిస్తారు. అయితే ఈ ఖర్చులన్నీ ఆ ప్లాట్లు, ఇళ్లు, విల్లాలలో కలిపినా.. మనకు మాత్రం ఉచితంగా ఇస్తున్నట్లు చూపిస్తారు. అయితే ఇలాగే ఓ రియల్ ఎస్టేట్ సంస్థ.. తమ వద్ద ఉన్న విల్లాలను అమ్ముకునేందుకు ఒక పెద్ద ఐడియా వేసింది. తమ వద్ద విల్లాలను కొనుగోలు చేస్తే.. అవి కొన్న వారికి ఒక్కొక్కరికీ రూ.4 కోట్ల విలువైన లాంబోర్గిని ఉరుస్ కారును ఉచితంగా అందించనున్నట్లు ఆఫర్ పెట్టారు. దీనికి సంబంధించి ఓ ట్విటర్‌లో ఒక పోస్ట్ పెట్టగా.. అది కాస్తా తెగ వైరల్ అవుతోంది.
ఉత్తర్‌ప్రదేశ్‌లోని నోయిడాకు చెందిన ఓ ప్రముఖ రియల్ ఎస్టేట్ సంస్థ జేపీ గ్రీన్స్ ఈ బంపరాఫర్‌ను ప్రకటించింది. తమ వద్ద లగ్జరీ విల్లా కొన్నవారికి లాంబోర్గిని ఉరుస్ కారును ఉచితంగా ఇస్తామని సోషల్ మీడియాలో పోస్ట్ చేశారు. దీంతో ఈ పోస్ట్ కాస్తా ప్రస్తుతం తెగ వైరల్‌గా మారింది. తమ తాము విక్రయించే రూ.26 కోట్ల విలువైన అల్ట్రా-ప్రీమియం విల్లాలను కొనుగోలు చేసే వారికి లాంబోర్గిని ఉరుస్ కారును ఫ్రీగా ఇస్తామని పేర్కొంది.
అంతేకాకుండా ఈ విల్లాల్లో ఉండే వారికి ఇతర విలాసవంతమైన సౌకర్యాలను కూడా కల్పించనున్నట్లు తెలిపింది. పార్కింగ్‌, స్విమ్మింగ్‌ ఫూల్‌, థియేటర్‌, క్లబ్ మెంబర్షిప్, గోల్ఫ్ కోర్స్ కోసం ఈ రూ.26 కోట్లకు అదనంగా మరో రూ.50 లక్షలు చెల్లించాల్సి ఉంటుందని జేపీ గ్రీన్స్ సంస్థ స్పష్టం చేసింది. రూ.30 లక్షలు పార్కింగ్‌కు.. రూ. 7.5 లక్షలు కరెంట్ జనరేటర్‌కు.. మరో రూ.7.5 లక్షలు క్లబ్ మెంబర్షిప్ కోసం చెల్లించాలని తెలిపింది.
అయితే ఈ ఆఫర్ కొద్దిరోజుల వరకు మాత్రమే అందుబాటులోకి ఉంటుందని తెలిపింది. తమ వద్ద విల్లాలు రూ.51 లక్షల నుంచి రూ.30 కోట్ల వరకు ఉన్నట్లు వెల్లడించింది. ఇందులో 3 BHK, 4 BHK, 5 BHK, 6 BHKలు ఉన్నట్లు స్పష్టం చేసింది. ఈ విషయాన్ని గౌరవ్ గుప్తా అనే రియల్ ఎస్టేట్ వ్యాపారి సోషల్ మీడియాలో పోస్ట్ చేశారు. ఈ పోస్ట్ చూసిన నెటిజన్లు రకరకాలుగా కామెంట్లు చేస్తున్నారు.
