ఎంప్లాయీస్ ప్రావిటెండ్ ఫండ్ ఆర్గనైజేషన్ (EPFO- ఉద్యోగుల భవిష్య నిధి సంస్థ).. ఉద్యోగులకు ఈపీఎఫ్ అకౌంట్ అందిస్తుంది. సంఘటిత రంగంలోని కనీసం 20 మందికిపైగా ఉద్యోగులు కంపెనీలు ఏవైనా ఉద్యోగుల్ని పీఎఫ్ పథకంలో చేర్చాల్సి ఉంటుంది. ఇక ఈపీఎఫ్ఓ వేతన పరిమితి ప్రస్తుతం రూ. 15 వేలుగా ఉన్న సంగతి తెలిసిందే. అయితే ఎప్పటినుంచో దీనిని పెంచాలన్న డిమాండ్ వినిపిస్తోంది. ఇక ఇటీవల మరో 40 శాతం పెంచి రూ. 21 వేలకు చేర్చాలని కేంద్రం భావిస్తున్నట్లు వార్తలు వచ్చాయి. ఎట్టకేలకు ఇది నిజమయ్యే రోజు రాబోతున్నట్లు తెలుస్తోంది. కేంద్ర ప్రభుత్వం త్వరలోనే ఈ పీఎఫ్ వేతన పరిమితిపై అధికారిక ప్రకటన విడుదల చేయనున్నట్లు విశ్వసనీయ వర్గాలు వెల్లడించాయి. అయితే దీనిని రూ. 21 వేలు కాకుండా.. రూ. 25 వేలకు పెంచాలని ఉద్యోగ సంఘాలు డిమాండ్ చేస్తున్నాయి.
ఏదేమైనా ఈ వేతన పరిమితి పెరిగితే ఉద్యోగులకు రిటైర్మెంట్ సమయానికి తీసుకునే పీఎఫ్ నిధి మొత్తం పెరుగుతుంది. ఇంకా అధిక పెన్షన్ అందుతుందని చెప్పొచ్చు. చివరిసారిగా రూ. 6500 గా ఉన్న వేతన పరిమితిని మోదీ సర్కార్ రూ. 15 వేలకు పెంచింది. అప్పుడు దాదాపు 130 శాతానికిపైగా పెంచడం విశేషం. ఇప్పటికే ఆగస్టులో ఇప్పుడు వేతన పరిమితి పెంచాలని కార్మిక శాఖ.. కేంద్ర ఆర్థిక మంత్రిత్వ శాఖకు ప్రతిపాదన కూడా పంపినట్లు తెలిసింది. ఈ వేతన పరిమితి పెంపు ఎలాంటి ప్రభావం చూపుతుందనేది తెలుసుకుందాం.
ప్రతి ఉద్యోగి జీతంలో నుంచి కంపెనీ ప్రతి నెలా 12 శాతం పీఎఫ్ అకౌంట్లో జమ చేస్తుంది. ఇక కంపెనీ కూడా అంతే మొత్తం తన వాటాగా జమ చేయాలి. ఉద్యోగి వాటా మొత్తం పీఎఫ్ అకౌంట్లోకి వెళ్తుంది. ఇక కంపెనీ వాటాగా 3 శాతానికిపైగా మాత్రమే పీఎఫ్ అకౌంట్లోకి వెళ్తుంది. మిగతా 8 శాతానికిపైగా ఎంప్లాయీస్ పెన్షన్ స్కీమ్ (EPS) లోకి వెళ్తుంది. రిటైర్మెంట్ తర్వాత ఇదే పెన్షన్ రూపంలో వస్తుంది. ఇక ఇప్పుడు వేతన పరిమితి పెరిగినట్లయితే ఈపీఎఫ్, ఈపీఎస్ కాంట్రిబ్యూషన్ పెరగడంతో.. ఎక్కువ ప్రయోజనం అందుకోవచ్చు.
ఈపీఎస్ పెన్షన్ లెక్కించేందుకు ఒక ఫార్ములా ఉంటుంది.
EPS పెన్షన్ = {(యావరేజ్ శాలరీX పెన్షనబుల్ సర్వీస్)}/70
ఇక్కడ యావరేజ్ శాలరీ అంటే బేసిక్ శాలరీ ప్లస్ డీఏ.
ఇక మాగ్జిమమ్ పెన్షనబుల్ శాలరీ ప్రస్తుతం రూ. 15 వేలుగా ఉంది. మాగ్జిమమ్ పెన్షనబుల్ సర్వీస్ 35 సంవత్సరాలు. ఇప్పుడు గరిష్ట వేతన పరిమితి రూ. 15 వేల చొప్పున ఈపీఎస్ పెన్షన్= (15,000X35)/70= రూ. 7500 ఇది ప్రతి నెలా అందే పెన్షన్.
ఇప్పుడు గరిష్ట వేతన పరిమితి రూ. 21 వేలకు చేరినట్లయితే అప్పుడు ఈపీఎస్ పెన్షన్= (21,000X35)/70= రూ. 10,050 ప్రతి నెలా పెన్షన్ అందుతుంది. అంటే ప్రతి నెలా పెన్షన్ మొత్తం రూ. 2,550 పెరుగుతుందని చెప్పొచ్చు. ఇది గరిష్ట పెన్షన్ అనేది గుర్తుంచుకోవాలి. సర్వీసు కాలాన్ని బట్టి.. బేసిక్ శాలరీని బట్టి ఇది మారుతుంటుంది.
