రూ. 12 లక్షలు కడితేనే అమెరికాలోకి టూరిస్ట్‌ల ప్రవేశం

గతంలో ఉన్న జాబితాకు మరో నాలుగు దేశాలను చేర్చడంతో, ఈ నిబంధన వర్తించే దేశాల సంఖ్య మొత్తం ఏడుకు పెరిగింది. ఈ కొత్త నిబంధనలను పైలట్ ప్రోగ్రామ్‌గా 2025 ఆగస్టు 20 వచ్చే ఏడాది ఆగస్టు 5 వరకు అమలు చేస్తున్నారు. కొత్తగా వీసా బాండ్ జాబితాలో మాలి, మౌరిటానియా, సావో టోమ్ అండ్ ప్రిన్సిపే, టాంజానియాలను చేర్చారు.

ఈ దేశాల పౌరులు B1/ B2 వీసాలకు అర్హులే అయినప్పటికీ, అమెరికాలో అడుగు పెట్టాలంటే… తప్పనిసరిగా 5,000 డాలర్లు, 10,000 లేదా 15,000 డాలర్లు (సుమారు రూ. 4 లక్షల నుంచి రూ. 12 లక్షల వరకు) మొత్తాన్ని బాండ్‌గా డిపాజిట్ చేయాలి. ఈ బాండ్ ఎంత అనేది వారి వీసా ఇంటర్వ్యూ సమయంలో అధికారులు నిర్ణయిస్తారు. అంతేకాక, ఫామ్ I-352ను కూడా సమర్పించాల్సి ఉంటుంది.

ఆ దేశాల పౌరుల్లో వీసా గడువు ముగిసినా తిరిగి వెళ్లకపోవడం (వీసా ఓవర్‌స్టే) రేటు ఎక్కువగా ఉండటమే వీసా బాండ్‌ను విధించడానికి ప్రధాన కారణం. డిపార్ట్‌మెంట్ ఆఫ్ హోమ్‌ల్యాండ్ సెక్యూరిటీ నివేదిక ప్రకారం.. మాలావి వంటి దేశాల ఓవర్‌స్టే రేటు 14% కంటే ఎక్కువగా ఉంది. ది గాంబియా అయితే ఏకంగా 38.79% ఓవర్‌స్టే రేటును నమోదు చేసింది. ఇలాంటి దేశాల నుంచి వచ్చే తాత్కాలిక సందర్శకులను నియంత్రించడం, అలాగే వీసా నిబంధనలు ఉల్లంఘించినవారికి కష్టాలు తప్పవని చెప్పడానికే ఈ కఠిన నిర్ణయం.

మన భారతీయుల విషయానికొస్తే, ఓవర్‌స్టే రేటు చాలా తక్కువగా ఉంది. 2023 ఆర్థిక సంవత్సరంలో B1/ B2 వీసాలకు గాను మన ఓవర్‌స్టే రేటు కేవలం 1.29% మాత్రమే ఉంది. కాబట్టి, ఈ వీసా బాండ్ నిబంధన మన దేశ పౌరులకు వర్తించదు. ఇక, బాండ్ కట్టిన వారికి తమ డబ్బు తిరిగి రావాలంటే, వారు అనుమతి ఇచ్చిన తేదీలోపు అమెరికా నుంచి తప్పనిసరిగా బయలుదేరాలి. వీసా తీసుకున్నా అమెరికాకు వెళ్లకపోయినా, లేదా ఎంట్రీ పోర్ట్‌లో తిరస్కరణకు గురైనా కూడా బాండ్‌ను రద్దు చేసి డబ్బు వాపసు ఇస్తారు.

ఈ వీసా బాండ్ వర్తించే పౌరులు అమెరికాలో అడుగు పెట్టేందుకు, తిరిగి వెళ్లేందుకు కొన్ని నిర్దిష్ట పోర్ట్ ఆఫ్ ఎంట్రీలను మాత్రమే ఉపయోగించాలి. బోస్టన్, న్యూయార్క్, వాషింగ్టన్ డల్లెస్ అంతర్జాతీయ విమానాశ్రయాల నుంచి ప్రవేశించాల్సి ఉంటుంది. ఈ చర్యలన్నీ అమెరికా ఇమ్మిగ్రేషన్ వ్యవస్థ సమగ్రతను కాపాడటానికి, ఓవర్‌స్టే సమస్యను అదుపు చేయడానికి ట్రంప్ పరిపాలన తీసుకుంటున్న కఠిన చర్యలలో భాగమే.