పెట్టుబడులపై రిస్క్ లేకుండా స్థిరమైన రిటర్న్స్ కోసం చాలా మంది బ్యాంక్ ఫిక్స్డ్ డిపాజిట్లలో ఇన్వెస్ట్ చేస్తుంటారని చెప్పొచ్చు.
ఇక్కడ గ్యారెంటీ రిటర్న్స్ ఉంటాయి. నిర్దిష్ట వడ్డీ రేట్ల ప్రకారం.. నిర్ణీత కాల పరిమితికి రాబడి వస్తుందని చెప్పొచ్చు. సాధారణ ప్రజల కంటే సీనియర్ సిటిజెన్లకు సాధారణంగా 50 బేసిస్ పాయింట్ల వరకు అదనంగా వడ్డీ వస్తుంది. రిజర్వ్ బ్యాంక్ ఆఫ్ ఇండియా (RBI) కొంత కాలంగా కీలక రెపో రేట్లను తగ్గిస్తుండగా.. బ్యాంకులు లోన్ వడ్డీ రేట్లను తగ్గిస్తూ ఇదే సమయంలో బ్యాంక్ ఫిక్స్డ్ డిపాజిట్ల వడ్డీ రేట్లను తగ్గిస్తున్నాయి. దీంతో బ్యాంక్ ఎఫ్డీలు ఆకర్షణ కోల్పోతున్నాయని చెప్పొచ్చు. గతంలో ఆర్బీఐ రెపో రేటు 6.50 శాతం వద్ద గరిష్ఠాల్లో ఉన్నప్పుడు.. చాలా బ్యాంకులు డిపాజిట్లపై అధిక వడ్డీ ఆఫర్ చేశాయి.
2025లోనే రెపో రేటు 6.50 శాతం నుంచి 1.25 శాతం తగ్గి 5.25 శాతానికి చేరగా.. బ్యాంక్ డిపాజిట్ వడ్డీ రేట్లు గణనీయంగా తగ్గుముఖం పట్టాయి. దీంతో గతంలో కంటే ఎఫ్డీలపై రాబడి తగ్గుతూ వచ్చింది. అయినప్పటికీ.. దీర్ఘకాలంలో మెరుగైన, రిస్క్ లేని రిటర్న్స్ కోసం సీనియర్ సిటిజెన్లకు ఇప్పటికీ ఇవి బెస్ట్ ఆప్షన్లుగా ఉన్నాయి. వీరికి రెగ్యులర్ డిపాజిట్ల కంటే 0.50 శాతం వడ్డీ అధికంగా వస్తుండటమే కారణం.
మరి ఇప్పుడు 5 సంవత్సరాల వ్యవధి ఫిక్స్డ్ డిపాజిట్లపై దేశంలోని టాప్ బ్యాంకుల్లో.. సాధారణ ప్రజలకు, సీనియర్ సిటిజెన్లకు వడ్డీ రేట్లు ఎలా ఉన్నాయనేది తెలుసుకుందాం. ఇక్కడ రూ. 1 లక్ష డిపాజిట్ చేస్తే రాబడి ఎలా ఉంటుందో కూడా తెలుసుకుందాం.
స్టేట్ బ్యాంక్ ఆఫ్ ఇండియాలో ఐదేళ్ల ఎఫ్డీపై సాధారణ ప్రజలకు వడ్డీ రేటు 6.05 శాతంగా ఉంది. ఇక్కడ రూ. 1 లక్ష జమ చేస్తే.. ఐదేళ్లకు వీరికి రూ. 35,018 వడ్డీ వస్తుంది. సీనియర్ సిటిజెన్లకు వడ్డీ రేటు 7.05 శాతంగా ఉండగా.. రూ. 41,826 వడ్డీ వస్తుంది.
అతిపెద్ద ప్రైవేట్ రంగ బ్యాంకు.. హెచ్డీఎఫ్సీ బ్యాంకులో చూస్తే ఐదేళ్ల వ్యవధికి వడ్డీ రేట్లు సాధారణ ప్రజలకు 6.15 శాతం, సీనియర్ సిటిజెన్లకు 6.65 శాతంగా ఉన్నాయి. ఇక్కడ రూ .1 లక్ష జమ చేస్తే వరుసగా మెచ్యూరిటీకి రూ. 35,684, రూ. 39,064 చొప్పున వడ్డీ వస్తుంది.
ఐసీఐసీఐ బ్యాంకులో ఐదు సంవత్సరాల వ్యవధి ఫిక్స్డ్ డిపాజిట్పై సాధారణ ప్రజలకు 6.60 శాతం, సీనియర్ సిటిజెన్లకు 7.10 శాతం వడ్డీ ఆఫర్ చేస్తోంది. ఇక్కడ రూ. 1 లక్షపై వరుసగా రూ. 38,723; రూ. 42,175 వడ్డీ వస్తుంది.
పంజాబ్ నేషనల్ బ్యాంకులో చూస్తే ఐదేళ్ల డిపాజిట్ వడ్డీ రేట్లు వరుసగా 6 శాతం, 6.80 శాతంగా ఉన్నాయి. ఇక్కడ రూ. 1 లక్ష జమ చేస్తే వరుసగా వడ్డీ రూ. 34,686; రూ. 40,094 చొప్పున వస్తుంది.
బ్యాంక్ ఆఫ్ బరోడాలో వడ్డీ రేట్లు వరుసగా 6 శాతం, 7 శాతంగా ఉన్నాయి. ఇక్కడ రూ. 1 లక్ష డిపాజిట్ చేస్తే మెచ్యూరిటీకి వరుసగా రూ. 34,686; రూ. 41,478 వడ్డీ వస్తుంది.
