హైదరాబాద్ నగరం విశ్వనగరం మారుతోంది. ఈ క్రమంలోనే నగర ప్రజల అవసరాలను తీర్చేలా హైదరాబాద్లో భారీ నిర్మాణాలు చేపడుతున్నారు. ఇందులో భాగంగా హైదరాబాద్లోనే అత్యంత ఎత్తైన భవనం ఘట్కేసర్లో ఏర్పాటు కానుంది. 72 అంతస్తులతో డ్యాన్సింగ్ డాఫోడిల్స్ పేరుతో ఈ ఆకాశహర్మ్యాన్ని నిర్మించనున్నారు. ఈ ప్రాజెక్టు కావాల్సిన ప్రాథమిక అనుమతుల కోసం దరఖాస్తు చేసుకోగా.. అగ్నిమాపక శాఖ నుంచి ఇప్పటికే అనుమతి వచ్చింది.ఈ విషయాన్ని అగ్నిమాపకశాఖ అధికారులు కూడా తెలిపారు
తెలంగాణ రాజధాని హైదరాబాద్ విశ్వనగరంగా అభివృద్ధి చెందుతోంది. అంతర్జాతీయ స్థాయిలో పేరు, ప్రఖ్యాతులు గడిస్తోంది. ఎన్నో జాతీయ, అంతర్జాతీయ సంస్థలు హైదరాబాద్ గడ్డపై ఇప్పటికే కొలువుదీరాయి. మరికొన్ని ఏర్పాటు చేసే ఆలోచనలో ఉన్నాయి. దీంతో హైదరాబాద్ నగరం వేగంగా విస్తరిస్తోంది. నగరం అవసరాల మేరకు రియల్ ఎస్టేట్ నిర్మాణాలు కూడా జరుగుతున్నాయి. ఈ క్రమంలోనే నింగినంటే ఎన్నో ఆకాశ హర్మాలు హైదరాబాద్లో నిర్మించారు. నిర్మిస్తున్నారు కూడా.. ఈ నేపథ్యంలోనే హైదరాబాద్ శివారు ప్రాంతమైన ఘట్కేసర్లో ఓ భారీ భవనం ఏర్పాటు కానుంది. 72 ఆంతస్తుల ఎత్తైన భవనాన్ని ఘట్కేసర్ ప్రాంతంలో నిర్మించనున్నారు. హైదరాబాద్లోనే అత్యంత ఎత్తైన, ఆకర్షణీయమైన భవనంగా ఇది నిలవనుంది. ఘట్కేసర్లోని ఓ ఇంజనీరింగ్ కళాశాల పక్కన దీనిని నిర్మిస్తున్నట్లు సమాచారం.
మరోవైపు అగ్నిమాపకశాఖ అధికారులు కూడా ఈ విషయాన్ని ఇప్పటికే వెల్లడించారు. హైదరాబాద్లోనే అత్యంత ఎత్తైన భవనం ప్రస్తుతం కోకాపేటలో ఉంది. ఇది 60 అంతస్తుల భవనం. దీనిని తలదన్నేలా ఘట్కేసర్లో 72 అంతస్తుల భవనం నిర్మించనున్నారు. ఈ భవనం నిర్మాణం కోసం ప్రొవిజినల్ ఎన్వోసీ కోసం ఇప్పటికే దరఖాస్తు చేసుకోగా.. రెండు నెలల కింద అనుమతులు కూడా జారీ అయ్యాయి. అగ్నిమాపకశాఖ డైరెక్టర్ జనరల్ విక్రమ్సింగ్మాన్ ఈ విషయాన్ని ఇటీవల ఓ సందర్భంలో వెల్లడించారు. ఇలాంటి భవనాలలో మంటలను నియంత్రించడానికి కావాల్సిన అధునాతన పరికరాలు సైతం కొనుగోలు చేయనున్నట్లు విక్రమ్ సింగ్ మాన్ తెలిపారు.
మరోవైపు డ్యాన్సింగ్ డాఫోడిల్స్ అనే పేరుతో ఈ 72 అంతస్తుల రెసిడెన్షియల్ టవర్ నిర్మిస్తున్నట్లు తెలిసింది. దీని నిర్మాణానికి కావాల్సిన ప్రాథమిక అనుమతుల కోసం దరఖాస్తు చేసుకున్నట్లు సమాచారం. ఘట్కేసర్ ఔటర్ రింగ్ రోడ్డు సమీపంలో దీనిని నిర్మిస్తున్నారు. ఈ భవనం ఎత్తు సుమారుగా 244.6 మీటర్లు వరకూ ఉండొచ్చని తెలిసింది. డ్యాన్సింగ్ డాఫోడిల్స్ అంటే బాగా ఎత్తుండి.. గాలిలో మెలికలు తిరుగుతూ, ఒంపులుగా ఉండే నిర్మాణ శైలి. ఈ ప్రతిపాదిత ప్రాజెక్టులో 3 పడక గదులు ఉండే 692 అపార్టుమెంట్లు, 4 పడక గదులు ఉండే 274 ఆపార్టుమెంట్లను నిర్మించనున్నట్లు తెలిసింది.
