వెచ్చగా అమ్మ పొత్తిళ్లలో బజ్జోవాల్సిన నవజాత ఆడ శిశువును కర్కశంగా మట్టిలో కలిపేద్దామనుకున్నారు. ప్రాణంతో ఉండగానే మట్టిలో పూడ్చేశారు. అటుగా వెళ్తోన్న ఓ ట్యాంకర్ డ్రైవర్ మట్టిలో ఏదో కదులుతున్న ఆనవాళ్లు గుర్తించి తవ్విచూశాడు. పసిగడ్డు కొనఊపిరితో కొట్టుమిట్టాడుతుండగా.. స్థానిక ఉపాధి కూలీల సాయంతో ఆసుపత్రికి తరలించి పసికందుకు పునర్జన్మను ప్రసాదించాడు. గుండెలు పిండేసే ఈ ఘటన హనుమకొండ జిల్లా దామెర మండలం ఊరుగొండ వద్ద జాతీయరహదారి పక్కన శనివారం చోటుచేసుకుంది. స్థానికులు తెలిపిన వివరాల ప్రకారం.. హైదరాబాద్ – భూపాలపట్నం జాతీయ రహదారి విస్తరణ పనులు జరుగుతున్నాయి. ఈ క్రమంలో ట్యాంకర్ డ్రైవర్ రాందినయ్‌ జాతీయరహదారి పక్కనే ఉన్న నీటి తొట్టి నుంచి శనివారం నీటిని రోడ్డు విస్తరణ పనులకు తీసుకువెళ్తున్నాడు. నీటితో ట్యాంకర్‌ను నింపుతున్న క్రమంలో రహదారి పక్కనే మట్టిలో ఓ శిశువు కాళ్లు, చేతులు కదులుతూ కనిపించింది. మట్టిని తొలగించి చూడగా ఓ ఆడశిశువు కనిపిచింది. కొన ఊపిరితో పాప కొట్టుమిట్టాడుతోంది. లారీ డ్రైవర్ వెంటనే అప్రమత్తమై.. అక్కడే పనిచేస్తున్న ఉపాధి హామీ కూలీలను పిలిచి శిశువును కాపాడారు.
విషయం తెలుసుకున్న పోలీసులు అక్కడకు రాగా.. వారి వాహనంలోనే దామెర క్రాస్‌ రోడ్డులోని ఓ ప్రైవేటు ఆసుపత్రికి తరలించారు. అక్కడ ప్రథమ చికిత్స అనంతరం 108 వాహనంలో ఎంజీఎం ఆసుపత్రికి తరలించారు. శిశువు ఆరోగ్యం ప్రస్తుతం నిలకడగా ఉందని ఎంజీఎం వైద్యులు తెలిపారు. ఆడ శిశువు కావడంతో తల్లిదండ్రులే ఈ దారుణానికి పాల్పడి ఉంటారనే కోణంలో దర్యాప్తు చేస్తున్నట్లు పోలీసులు తెలిపారు.
