టీ20 వరల్డ్ కప్ జట్టు ప్రకటన గురించి క్రికెట్ అభిమానులు అంతా ఎంతో ఆసక్తిగా ఎదురుచూస్తూ వచ్చారు. టీమిండియా అనే కాదు ఇతర జట్ల విషయంలోనూ అందరిలోనూ ఎగ్జయిట్మెంట్ నెలకొంది.
అయితే భారత జట్టు ఎంపిక మాత్రం ఇతర టీమ్స్ కంటే ఇంకా ఎక్కువ అటెన్షన్ తీసుకుంది. దీనికి కారణం ప్రస్తుత క్రికెట్లోని టాప్ స్టార్స్లో ఎక్కువ మంది టీమిండియాలో ఉండటమే. నిన్నటి నుంచి వరల్డ్ కప్ స్క్వాడ్స్ ప్రకటన మొదలైంది. తొలుత న్యూజిలాండ్, ఆ తర్వాత సౌతాఫ్రికా, అనంతరం ఇంగ్లండ్ తమ ప్రపంచ కప్ జట్లను ప్రకటించాయి. పొట్టి కప్పులో ఆడే భారత జట్టు ఏదో కూడా ఇవాళ క్లారిటీ వచ్చేసింది. బీసీసీఐ టీ20 వరల్డ్ కప్ టీమ్ను అనౌన్స్ చేసింది. అయితే ఆ జట్టుకు హార్దిక్ పాండ్యాను వైస్ కెప్టెన్ చేయడంతో అందరూ షాకయ్యారు.
భారత వరల్డ్ కప్ జట్టులో మిగతా వాళ్ల సెలెక్షన్ ఎలా ఉన్నా హార్దిక్ వైస్ కెప్టెన్సీ అంశమే ఇప్పుడు హాట్ టాపిక్గా మారింది. చెత్తాటతో విమర్శల పాలవుతున్న అతడు.. ప్రపంచ కప్ జట్టులో ఉంటాడా? లేదా? కూడా అనుమానంగా మారింది. ఈ ఐపీఎల్లో హార్దిక్ 9 మ్యాచుల్లో 197 రన్స్ చేసి 4 వికెట్లే తీశాడు. దీంతో అతడు అక్కర్లేదు.. ఆ ప్లేసులో ఇతర యంగ్స్టర్స్కు అవకాశం ఇవ్వాలనే డిమాండ్లు ఊపందుకున్నాయి. ఈ తరుణంలో టీమ్ అనౌన్స్ చేసిన బీసీసీఐ.. పాండ్యాను జట్టులోకి తీసుకుంది. అతడికి బెర్త్ ఇవ్వడమే గాక ఏకంగా వైస్ కెప్టెన్గానూ ప్రమోషన్ ఇచ్చింది. దీంతో బోర్డు ఎందుకిలా చేసింది? బీసీసీఐ పెద్దలకు అసలు ఏమైంది? ఏం చూసి హార్దిక్కు ఇంత పెద్ద రెస్పాన్సిబిలిటీ ఇస్తున్నారు? టీమ్లో చోటు ఇవ్వడమే గొప్ప అంటే ఇంకా వైస్ కెప్టెన్సీ కూడానా? అంటూ విమర్శకులు విరుచుకుపడుతున్నారు. అయితే నిశితంగా గమనిస్తే హార్దిక్ మీద బోర్డు నమ్మకం ఉంచడానికి పలు కారణాలు కనిపిస్తున్నాయి.
గత కొన్నేళ్లుగా టీమ్లో హార్దిక్ రెగ్యులర్ ప్లేయర్ అనేది తెలిసిందే. గాయాలతో దూరమైనప్పుడు తప్పితే ప్రతి సిరీస్లోనూ అతడు టీమ్లో భాగంగా ఉన్నాడు. సింగిల్ హ్యాండ్తో భారత జట్టుకు ఎన్నో విజయాలు అందించాడు. ఇంటర్నేషనల్ క్రికెట్లో హ్యూజ్ ఎక్స్పీరియెన్స్ ఉండటం అతడికి ప్లస్ అయింది. ఒత్తిడిలోనూ ఎలా ఆడాలో పాండ్యాకు తెలిసి ఉండటం కలిసొచ్చింది. గతంలో ప్రెజర్ సిచ్యువేషన్స్లో నుంచి టీమ్ను ఒడ్డున పడేసిన ట్రాక్ రికార్డు ఉండటం సెలెక్టర్లకు మరింత భరోసాను ఇచ్చింది. రోహిత్ వారసుడిగా ఫ్యూచర్ టీ20 టీమ్ కెప్టెన్గా ముందు నుంచి అతడ్ని ప్రిపేర్ చేశారు. అందుకే ఐపీఎల్లో ఫెయిలైనా హార్దిక్పై నమ్మకం ఉంచి ప్రపంచ కప్ జట్టులో చోటు కల్పించారు. పాండ్యా మీద కోచ్ ద్రవిడ్, బీసీసీఐ పెద్దలకు ఉన్న గురి కారణంగా అతడికి వైస్ కెప్టెన్సీ పోస్ట్ దక్కింది.
