“కజ్జికాయ” తయారు చేయడానికి ఒక కొత్త మార్గం

కావాల్సిన పదార్థాలు :

పిండి కోసం :

• మైదా – రెండు కప్పులు
• సన్నని బొంబాయి రవ్వ – పావు కప్పు
• ఉప్పు – రుచికి సరిపడా
• నెయ్యి – మూడు టేబుల్​స్పూన్లు
• నూనె – వేయించడానికి తగినంత

• స్టఫింగ్ కోసం :

  • నెయ్యి – మూడు టేబుల్​స్పూన్లు
  • డ్రైఫ్రూట్స్ తరుగు – పావుకప్పు
  • బొంబాయి రవ్వ – అర కప్పు
  • ఎండుకొబ్బరి తురుము – ఒక కప్పు
  • యాలకుల పొడి – ఒకటీస్పూన్
  • పంచదార – ముప్పావు కప్పు

  • తయారీ విధానం :

    • ఈ రెసిపీ కోసం ముందుగా పిండిని సిద్ధం చేసుకోవాలి. ఇందుకోసం మిక్సింగ్ బౌల్​లో మైదా పిండిని తీసుకొని ఆపై అందులో సన్నని బొంబాయి రవ్వ, రుచికి తగినంత ఉప్పు, నెయ్యి వేసుకొని అది పిండికి పట్టేలా ఒకసారి బాగా కలుపుకోవాలి.
    • తర్వాత ఆ మిశ్రమంలో తగినన్ని నీటిని కొద్దికొద్దిగా యాడ్ చేసుకుంటూ సెమి సాఫ్ట్ కన్సిస్టెన్సీలో పిండిని కలుపుకొని మూతపెట్టి పావుగంట పాటు పక్కనుంచాలి.
    • అనంతరం స్టవ్ మీద పాన్ పెట్టుకొని రెండు టేబుల్​స్పూన్ల నెయ్యి వేసుకోవాలి. అది కరిగి కాస్త వేడయ్యాక సన్నగా కట్ చేసుకున్న డ్రైఫ్రూట్స్ తరుగు(జీడిపప్పు, బాదం, పిస్తా) వేసుకొని లో ఫ్లేమ్​లో వేయించుకోవాలి.
    • అవి కాస్త వేగిన తర్వాత బొంబాయి రవ్వ వేసుకొని అది మంచి వాసన వచ్చేంత వరకు ఫ్రై చేసుకోవాలి.
    • ఆ తర్వాత సన్నని ఎండుకొబ్బరి తురుము, ఒక టేబుల్​స్పూన్ నెయ్యి జత చేసుకొని కొబ్బరి కూడా కమ్మటి వాసన వచ్చేంత వరకు సన్నని సెగ మీద వేయించుకోవాలి.
    • ఎండుకొబ్బరి మాడిపోకుండా లైట్ గోల్డెన్ షేడ్ వచ్చే వరకు వేయించుకొని దించే ముందు యాలకుల పొడి వేసుకొని ఒకసారి కలిపి స్టవ్ ఆఫ్ చేసుకొని దించేసుకోవాలి.
  • ఇప్పుడు మిక్సీ జార్​లో పంచదార తీసుకొని కాస్త బరకగా గ్రైండ్ చేసుకొని ముందుగా వేయించి తీసుకున్న కొబ్బరితురుము మిశ్రమంలో వేసుకొని మొత్తం కలిసేలా మిక్స్ చేసుకుంటే ‘స్టఫింగ్’ రెడీ అయిపోతుంది.
  • అనంతరం పావుగంట పాటు పక్కనుంచిన పిండి ముద్దను తీసుకొని మరోసారి బాగా కలిపి దాన్ని రెండు సమాన భాగాలుగా చేసుకోవాలి.
  • తర్వాత పెద్ద చపాతీ పీట లేదా శుభ్రమైన కిచెన్ ఫ్లాట్​పారమ్​ మీద కొద్దిగా పొడి పిండిని చల్లుకొని ఒక పిండి తీసుకొని చపాతీ రోలర్​తో ఎంత వీలైతే అంత ఈవెన్​గా స్ప్రెడ్ చేసుకోవాలి.
• పిండి ఉండను పెద్ద వెడల్పాటి చపాతీలా చేసుకొని దానిపై ఏదైనా అంచులు షార్ప్​గా ఉండే బాక్సు మూతతో కాస్త వత్తినట్లు ప్రెస్ చేస్తే(ఫొటోలో చూపిస్తున్నవిధంగా) రౌండ్ పూరీలా వస్తుంది.
• అలా వీలైనన్ని వత్తుకొని ఎక్స్​ట్రా పిండిని తీసేసుకొని మిగిలిన పిండిలో ముద్దలో వేసుకొని కలుపుకోవాలి.
• నార్మల్​గా చాలా మంది చిన్న చిన్న పిండి ఉండలతో చపాతీలా చేసుకొని అందులో స్టఫింగ్ ఉంచి కజ్జికాయలు చేసుకుంటారు. ఇలా చేసుకుంటే కాస్త ఎక్కువ టైమ్ పడుతుంది. కానీ, అదే పైన చెప్పిన చిన్న ట్రిక్​తో తక్కువ టైమ్​లో ఎక్కువ కజ్జికాయలను రెడీ చేసుకోవచ్చు.

• అనంతరం అలా ప్రిపేర్ చేసుకున్న ఒక్కో పూరీ షీట్​పై తగినంత స్టఫింగ్ వేసుకొని ఆపై అంచుల వెంట కాస్త వాటర్ తడిచేసుకొని ఫోల్డ్ చేసుకొని అంచులు ఊడకుండా కాస్త ప్రెస్ చేసుకోవాలి.
• ఆ తర్వాత వాటికి షేప్ ఇవ్వడం కోసం ఫోర్క్ చెంచాతో ఫొటోలో చూపిస్తున్న విధంగా డిజైన్ చేసుకుంటే సరిపోతుంది.
• ఇదే ప్రాసెస్​లో పిండి మొత్తాన్ని కజ్జికాయల మాదిరిగా చేసుకొని ప్లేట్​లోకి తీసుకొని పక్కన పెట్టుకోవాలి.
• ఇప్పుడు స్టవ్ మీద కడాయిలో డీప్ ఫ్రైకి తగినంత నూనె పోసుకొని వేడి చేసుకోవాలి. ఆయిల్ వేడయ్యాక స్టవ్​ను లో ఫ్లేమ్​లోకి టర్న్ చేసుకొని ముందుగా ప్రిపేర్ చేసుకున్న కజ్జికాయలను పాన్​లో సరిపడినన్ని వేసుకొని రెండు వైపులా లైట్​గా వేయించాలి.
• ఆ తర్వాత మీడియం ఫ్లేమ్​లోకి మార్చి రెండు వైపులా క్రిస్పీగా, గోల్డెన్ కలర్​లోకి వచ్చాక టిష్యూ పేపర్ పరచిన ప్లేట్​లోకి తీసుకొని కాసేపు ఉంచి సర్వ్ చేసుకుంటే సరిపోతుంది. అంతే, సూపర్ టేస్టీగా కరకరలాడే “కజ్జికాయలు” మీ ముందు ఉంటాయి!

• చిట్కాలు :

  • ఇక్కడ మీరు మైదా పిండి వద్దనుకుంటే దాని ప్లేస్​లో గోధుమపిండిని అయినా తీసుకోవచ్చు.
  • ఒకవేళ బొంబాయి రవ్వ కాస్త లావుగా ఉంటే మిక్సీ జార్​లో వేసుకొని సన్నగా గ్రైండ్ చేసుకొని వాడుకోవాలి.
  • బొంబాయి రవ్వ వేసుకోవడం ద్వారా కజ్జికాయల పైన లేయర్ అనేది క్రిస్పీగా వస్తుంది.
  • కజ్జికాయలను సీల్ చేసుకునేటప్పుడు అవి ఊడిపోకుండా వత్తుకోవాలి. లేదంటే, ఆయిల్​లో వేసుకున్నప్పుడు స్టఫింగ్ నూనెలోకి పడిపోయే ఛాన్స్ ఉంటుంది.