Health insurance | దిల్లీ: ఆరోగ్య బీమాకు (Health insurance) సంబంధించి బీమా నియంత్రణ, అభివృద్ధి ప్రాధికార సంస్థ (IRDAI) కీలక మార్పులు చేసింది. పాలసీల కొనుగోలుకు ఉన్న వయోపరిమితిని తొలగించింది. ఏప్రిల్ 1 నుంచి ఈ మార్పు అమల్లోకి వచ్చింది. ఇంతకుముందు కొత్త ఇన్సూరెన్స్‌ పాలసీ కొనుగోలు చేయాలంటే గరిష్ఠ వయోపరిమితి 65 ఏళ్లుగా ఉండేది. ఇకపై వయసుతో సంబంధం లేకుండా ఎవరైనా ఆరోగ్య బీమా పొందొచ్చు. ఇక అన్ని వయసుల వారికీ బీమా సంస్థలు పాలసీలను జారీ చేయొచ్చు.

‘‘ఇకపై అన్ని వయసుల వారికీ ఆరోగ్య బీమాను ఇన్సూరెన్స్‌ సంస్థలు జారీ చేయొచ్చు. సీనియర్‌ సిటిజన్లు, విద్యార్థులు, పిల్లలు, గర్భిణులలు సహా కాంపిటెంట్‌ అథారిటీ పేర్కొన్న అన్ని వయసుల వారికి అనుగుణంగా బీమా సంస్థలు తమ ప్రొడక్టులను డిజైన్‌ చేయొచ్చు’’ అని ఐఆర్‌డీఏఐ తన నోటిఫికేషన్‌లో పేర్కొంది. ఈ నిర్ణయం వల్ల మరింత మందికి ఆరోగ్య సంరక్షణ అందించడంతో పాటు, కంపెనీలు తమ ఉత్పత్తులను వివిధీకరించుకోవడానికి వీలు పడుతుంది. సీనియర్‌ సిటిజన్లు వంటి నిర్దిష్ట వయసుల వారికి ప్రత్యేక పాలసీలు తీసుకురావాలని, వారి ఫిర్యాదుల పరిష్కారానికి ప్రత్యేక ఛానెల్‌ను ఏర్పాటు చేయాలని బీమా సంస్థలకు సూచించింది. ఐఆర్‌డీఏఐ తాజా నిర్ణయాన్ని పరిశ్రమ వర్గాలు స్వాగతించాయి.

దీంతో పాటు ఆరోగ్య బీమాకు సంబంధించి ఐఆర్‌డీఏఐ మరికొన్ని మార్పులు సైతం చేసింది. ముందస్తు వ్యాధుల వెయిటింగ్‌ పీరియడ్‌, మారటోరియం పీరియడ్‌లను తగ్గించింది. ఇంతకుముందు నాలుగేళ్లుగా ఉన్న వెయిటింగ్‌ పీరియడ్‌ను ఇప్పుడు 3 సంవత్సరాలకు కుదించింది. ఈ నిబంధన వల్ల ఒకవేళ మూడేళ్లు నిరంతరం ప్రీమియం మొత్తాన్ని చెల్లిస్తే.. ముందస్తు వ్యాధులను కారణంగా చూపి క్లెయిమ్‌లను బీమా సంస్థలు తిరస్కరించడానికి వీలుండదు. మారటోరియం వ్యవధిని 8 సంవత్సరాల నుంచి 5 ఏళ్లకు తగ్గించింది.